طيب انا رايح اشترى لاب أعمل تيست ازاااااى ؟

 

طيب انا رايح اشترى لاب أعمل تيست ازاااااى ؟

شراء لاب توب جديد

بشوف ناس بصراحه والله بتخبط ع اللاب و تنفخ ف المكان بتاع مروحة البروسيسور و تقول ع البركه  .. على فكرة ده مش بطيخه بتشوفها حمرا ولا قرعه .. من ناحية هنخبط ع اللاب ف هنخبط بس مش هقوله ع البركه بعد خبطة و نفخه 

بص يا سيدى و بصى يا ستى 

أولا : هتبص على البودى بتاع اللابتوب و تشوفه هل فيه شروخات او كسور ممكن تلاقى طبعا فيه خبطة بسيطه او تجريحه بسيطه ده عادى أما شرخ أو كسر ف شكرا لأنه مع الوقت هيفتح منك .

****************

ثانيا : و اللاب مقفول هترفعه شوية و تهزه و تشوف حاجه سايبه فيه زى مكان البطاريه مثلا أو الكفر بتاع الكارت الىل فى الجنب او مكان الهارد بيتهز لو كان الهارد فى الجنب زى الديفيدى كده .

***************

ثالثا : هتفتح اللاب و تحرك الشاشه فوق و تحت و عينك عليها تشوفها بتعمل فليكر ولا لأ ( بترعش يعنى  ) … او بتجيب خطوط ولا لأ أو بتطفى ولا لأ على فكرة لو بتاع الصيانه الىل هناك شاطر و اللاب مواصفاته جامده مش هيعيب اللاب ف حاجه هيفتحه و يغيرلك الكابل اللى واصل بين الشاشه و البورده و طبعا السعر هينزل بتاع 200 او 300 جنيه  .

***************

رابعا : هتجرب الكيبورد زووورااااااااار زووورااااااار على نوتباد طبعا او اى برنامج كتابه مع الكنترول و الأتل و الشيفت لو لقيته تقيل أو بيعلق او حروف مش شغاله هتفكك منه .

*******************

خامسا : هنخبط على الشاشه كده خبطتين تلاته ( خلى بالك بقول تخبط على الشاشه مش ترزع على الشاشه ) .. وتشوف هل بتقطع ولا بتجيب خطوط ولا الوانها بتتغير .. الطبيعى جدا انها تعمل رعشه بسيطه خالص يمكن تلاحظها فى تالت ولا رابع خبطة ده طبيعى .

********************

سادسا : هتحط اى سماعه هاند فرى ف المكان بتاعها ف اللاب و تشغل اى حاجه فيها صوت وحاول تحرك البنه بتاعة السماعه لفها مثلا او حركها فوق و تحت وشوف الصوت هيقطع ولا لأ بس طبعا تبئا متاكد من انه سماعتك اصلا سليمه و السلك بتاعها سليم مش تجيب سماعه من ام 20 جنيه و تروح تتيست بيها 

*********************

سابعا : شيل البطاريه من مكانها و اتاكد من انه المسامير كلها موجوده و بص على الالواح الصغيرة بتاعة البطاريه ما يكونش عليها صدا او متاكله سواء فى اللاب او البطاريه نفسها .

*********************

ثامنا : افتح فولدر ال Users اللى موجود ف الـ C وشوف اسم الفولدر ايه .. بعدها افتح الــ Command Prompt من قايمة ستارت و اعمل كليك يمين و شغله كأدمن .. هتلاقيه فاتح بالشكل ده :

C:\Windows\System32\

هتكتب CD..

C:\Windows

هتكتب تانى cd..

C:\

هتكتب cd USERS

c:\users\

هتكتب cd و جنبها اسم فولدر اليوزرز الىل انت شفته فى ال C و ليكن مثلا gfx

C:\Users\gfx

هتكتب بئا الأمر ده

Powercfg -energy

و تستنى شوية لغاية ما يخلص رغى  .. و تروح فولدر اليوزرز هتلاقى ملف افتحه بأى متصفح عندك و دور فيه لغاية ما تلاقى رقمين تحت بعض واحد مكتوب ادامه Last Full Charge و رقم تانى اسمه Design Capacity .. افتح اى اله حاسبه و اقسم ال Last على ال Design و الرقم اللى هيطلع اضربه ف 100 .. مفترض هيطلعلك النسبة الحقيقه الىل ف البطارية عندك كام دلوقتى طابق النسبه دى على النسبة الموجوده ادامك لما تقف على رمز البطاريه لو مختلفه تماااااااما يبئا حاجه من اتنين يا البطاريه دى خربانه تماما يا اما تخلى صاحخب المكان يجيبلك شاحن قوى مثلا 8 او 10 او 11 أمبير و خلى البطاريه تشحن شوية و شيل الشاحن و اشتغل على الجهاز شوية وشوف المده اللى مديهالك على ما البطارية تخلص لو لقيتها نفس المده الىل انت اشتغلتها او اقل دقيقة ولا اتنين يبئا الشاحن كان هو المشكله و البطارية سليمه لو لأ تغير البطارية دى فورا ..

*************************

تاسعا : جرب ال USB كلها واحد واحد و ياريت لو تجربهم على حاجه معاك تكون USB3 و هز الفلاشة او حركها وهى جوه ال USB شوفه واسع ولا ماسك مزبوط على الفلاشه ..